GENERELLE VILKÅR OG BETINGELSAR FOR MEDLEMSKAP I IDRETTSSENTERET

Medlemsvilkåra er standardvilkår for Idrettssenteret og den samarbeidande kjeda Spenst,
med lokale tilleggsvilkår der dette er aktuelt. Vilkåra gjeld mellom personen som er oppført
som «medlem» i medlemsavtalen og Idrettssenteret som er oppført i medlemsavtalen.

1. RETTAR OG PLIKTER

1.1 Idrettssenteret

1.1.1 Idrettssenteret skal leggje til rette for eit godt treningstilbod og halde apparat og utstyr i best mogleg stand. Idrettssenteret vil så langt det er mogleg tilpasse tilbod og opningstider etter medlemmet sine ønskje og bruksmønster.

1.1.2 Idrettssenteret skal arbeide for eit sunt og inspirerande treningsmiljø.

1.1.3 Idrettssenteret fråskriv seg ansvar for tap og skadar på personar eller gjenstandar som oppstår under, eller som følgje av, opphald i senteret, med mindre senteret har opptrådd aktlaust. Idrettssenteret kan gjennomføre tilgangskontroll og kontrollere dokumentasjon for rabatterte medlemskap ved behov, for å sikre at rette vilkår blir nytta.

1.1.4 Idrettssenteret skal tilby helse og trening for alle og vere ein trygg og helsefremjande stad for medlemene. Idrettssenteret arbeider aktivt for eit reint treningsmiljø og tolererer ikkje bruk, oppbevaring, sal, deling eller tilrettelegging for bruk av dopingmiddel i nokon form.

1.1.5 Idrettssenteret er ikkje ansvarleg for tjuveri eller anna tap av medlemmet sine personlege eigedelar som blir tekne med til senteret. Dette gjeld uavhengig av om eigedelane er oppbevarte i vanleg garderobeskap, verdiskap eller liknande.

1.2 Medlemmet

1.2.1 Medlemmet skal registrere seg ved ankomst før kvar trening. Medlemmet pliktar å følgje gjeldande trivselsreglar og tilvisingar frå dei tilsette.

1.2.2 Personar under 18 år som ønskjer medlemskap i Idrettssenteret, kan inngå medlemskap under føresetnad av at ein føresett inngår avtalen. Den føresette er juridisk ansvarleg for medlemskapet, inkludert alle betalingar knytte til dette.

1.2.3 Medlemmet er sjølv ansvarleg for å vere helsemessig skikka til å trene, og for at det etter Idrettssenteret si vurdering ikkje ligg føre openberr risiko for helse eller skade. Trening skjer til kvar tid på eige ansvar.

1.2.4 Medlemskap i Idrettssenteret kan teiknast av personar som ikkje har uteståande gjeld knytt til tidlegare medlemskap i Idrettssenteret, og som ikkje tidlegare har blitt utestengde frå eitt eller fleire Idrettssenteret-senter som følgje av brot på våre vilkår og reglar.

1.2.5 Medlemskapet er personleg og kan ikkje overdragast eller nyttast av andre. Medlemskapet gjeld frå startdatoen som er oppgjeven i medlemsavtalen. Medlemmet er sjølv ansvarleg for å sikre at tilgangen til Idrettssenteret ikkje blir misbrukt av andre. Ved mishald kan medlemmet bli utestengt i samsvar med punkt 8.

1.2.6 Medlemmet er ansvarleg for å informere Idrettssenteret om endringar i betalingsopplysningar og kontaktinformasjon, inkludert namn, adresse, e-postadresse, telefonnummer, kontonummer og annan relevant informasjon. Melding skal givast utan ugrunna opphald. Der det er lagt til rette for dette i Spenst Norge-appen, skal denne nyttast ved slike endringar.

1.2.7 Medlemmet skal gjere seg kjend med og følgje dei til kvar tid gjeldande vilkåra, reglane og retningslinjene ved Idrettssenteret som er oppgjeve i medlemsavtalen. Ved mishald og/eller brot kan Idrettssenteret avslutte medlemsavtalen med umiddelbar verknad i samsvar med punkt 8 om utestenging.

1.2.8 Medlemene er sjølve ansvarlege for ikkje å nytte dopingpreparat som går fram av den gjeldande dopinglista for treningssenter. Medlemmet har sjølv ansvar for å setje seg inn i kva dette inneber.

1.2.9 Bruk av dopingpreparat er kriminalisert etter legemiddellova § 24 a, og slik bruk kan bli meldt til politiet. Ta kontakt med senteret for informasjon om rutinar og reglar ved dopingkontroll ved grunngjeven mistanke.

1.2.10 Ved grunngjeven mistanke om dopingbruk kan Idrettssenteret kalle inn medlemmet til samtale og tilby dopingkontroll administrert av Antidoping Norge eller annan uavhengig fagleg aktør. Dopingkontroll blir berre gjennomført på grunnlag av skriftleg, frivillig og informert samtykke frå medlemmet.

Brot på denne føresegna, eller nekting av å medverke i oppfølging ved klar og grunngjeven mistanke om dopingbruk, oppbevaring, sal, deling eller tilrettelegging for bruk av dopingmiddel, blir rekna som vesentleg mishald av medlemsavtalen.

Slikt mishald kan medføre umiddelbar sperring av tilgang, oppseiing eller heving av medlemskapet med øyeblikkeleg verknad, samt politimelding dersom forholdet er straffbart. Eventuell utestenging kan gjelde alle avdelingane til Idrettssenteret.

1.2.11 Medlemmet får tilgang til Idrettssenteret sine digitale tenester gjennom sin personlege profil. Medlemmet må ikkje gi andre fysiske eller juridiske personar tilgang til desse tenestene gjennom deling av innloggingsinformasjon eller på annan måte. Sjå punkt 8 om utestenging.

2. SPENST FORDELSKLUBB

Idrettssenteret samarbeida med Spenstkjeden. Spenstkjeden er ansvarleg for fordelsklubben, som ein kan nytte seg av som Idrettssenteret medlem. 

2.1 Spenst har ein eigen fordelsklubb uavhengig av treningsmedlemskap, som gir tilgang til rabattar ved kjøp av varer og tenester frå Spenst og samarbeidspartnarar.

2.2 Fordelsklubben er gratis og tilgjengeleg for alle. Som medlem samtykkjer ein til at Spenst kan sende treningstips, medlemsinformasjon, tilbod og annan relevant informasjon via pushvarsel, Spenst-appen, SMS og/eller e-post. Medlemmet vel sjølv kva kanalar som skal nyttast.

SMS kan berre sendast til mobilabonnement knytte til det norske mobilnettet. For å bli medlem må ein vere over 16 år og ha adresse i Noreg.

Som medlem i Spenst Fordelsklubb samtykkjer ein til at Spenst kan lagre person- og kjøpsopplysningar som grunnlag for medlemstilbod.

Fordelsprogrammet kan når som helst avsluttast via SMS ved å sende kodeordet «Spenst STOPP» til 2173 eller ved å kontakte kundeservice på post@spenst.no.

Fordelsklubbavtalen gjeld til ho blir sagt opp av ein av partane.

3. FORCE MAJEURE

Dersom det oppstår ein situasjon som gjer det umogleg for Idrettssenteret å oppfylle sine plikter i samband med uttak av rabattar eller kjøp av varer og tenester, og som etter alminnelege kjøpsrettslege reglar blir rekna som force majeure, fell pliktene til den råka parten bort så lenge den ekstraordinære situasjonen varer.

Idrettssenteret vil så langt det er mogleg tilpasse tilbod og opningstider i samsvar med medlemene sine ønskje og bruksmønster. Idrettssenteret tek atterhald om å halde stengt eller redusere opningstider og tilbod i samband med til dømes heilagdagar, vedlikehaldsarbeid og force majeure som definert i dette punktet.

4. PERSONVERN, DATATRYGGLEIK OG BRUK I DIREKTEMARKNADSFØRING

4.1 Idrettssenteret vil til kvar tid behandle medlemmet sine personopplysningar i samsvar med personvernerklæringa vår og gjeldande lovverk.

4.2 Idrettssenteret er behandlingsansvarleg for opplysningane som blir lagra, behandla og nytta, inkludert namn, adresse, e-postadresse og mobilnummer, for å kunne verifisere mobilnummer, sende tilbod og kontakte medlemmet i samband med medlemskap i fordelsprogrammet.

4.3 Ved samtykke til elektronisk kommunikasjon via pushvarsel, SMS eller e-post i Fordelsklubben samtykkjer medlemmet til at Idrettssenteret kan samle inn, behandle og nytte personopplysningar til direkte marknadsføring, inkludert utsending av medlemsinformasjon, treningstips, rabattkodar, individuelle spesialtilbod og relevant informasjon om kampanjar.

4.4 Opplysningane skal ikkje utleverast til tredjepartar. Medlemmet har rett til innsyn i kva opplysningar som er lagra hos Idrettssenteret, og kan når som helst krevje opplysningar sletta frå Fordelsklubben.

4.5 Spørsmål om Fordelsklubben kan rettast til post@Idrettssenteret.no.

4.6 Utlevering av opplysningar til utanforståande kan ikkje skje utan medlemmet sitt skriftlege samtykke, med mindre utleveringa er lovpålagd eller skjer som ledd i betalingsinnkrevjing, forsikringskrav eller rekneskapsbehandling.
 

5. BETALING AV MEDLEMSKAP

5.1 Medlemskap i Idrettssenteret kan betalast kontant og/eller ved oppretting av månadleg medlemsavgift.

5.2 Den månadlege medlemsavgifta, etableringsgebyr og eventuelle andre avgifter etter dei til kvar tid gjeldande prisane hos Idrettssenteret, forfell til betaling på avtalt tidspunkt. Unntak kan gjelde ved innmelding og utmelding, der særskilde lokale vilkår gjeld. Det same gjeld for føresette eller andre som gjennom medlemsavtalen har teke på seg juridisk ansvar for medlemskapet.

5.3 Medlemmet er ansvarleg for å sjå til at medlemsavgifta blir betalt ved forfall og må kontakte Idrettssenteret dersom betalingsgrunnlaget ikkje er motteke.

5.4 AvtaleGiro og automatiske betalingstenester

5.4.1 AvtaleGiro er ei betalingsordning der avtalt månadleg treningsavgift blir trekt frå medlemmet sin konto rundt den 20. i kvar månad.

Avtalen om AvtaleGiro gjeld til ein av partane seier han opp. Medlemmet pliktar å sørgje for tilstrekkeleg dekning på kontoen. Dersom den månadlege treningsavgifta ikkje kan trekkjast på grunn av manglande dekning, kan det bli lagt til gjeldande påminnings- eller fakturagebyr.

5.4.2 Ved bruk av AvtaleGiro eller andre automatiske betalingstenester er medlemmet sjølv ansvarleg for å inngå nødvendig avtale med banken om automatisk trekk av den månadlege medlemsavgifta. Medlemmet må til kvar tid sørgje for at beløpsgrensa dekkjer fakturabeløpet, og at betaling skjer innan forfallsdato.Dersom medlemmet ikkje har oppretta automatisk betalingsteneste, eller banken ikkje har stadfesta tenesta til Idrettssenteret innan den 5. i månaden, vil det bli sendt faktura med tilhøyrande fakturagebyr.

5.4.3 Dersom AvtaleGiro-fullmakta blir sletta i bindingstida eller avtaleperioden, vil resterande betalingar forfalle til betaling i samsvar med gjeldande avtalevilkår. Ved fakturering kjem det i tillegg fakturagebyr. Særskilde lokale vilkår gjeld ved innmelding og utmelding. Desse vilkåra er tilgjengelege ved det lokale senteret.

5.4.4 Dersom medlemmet har mishalde eit betalingskrav og mottek betalingspåminning, inkassovarsel eller inkassokrav frå ekstern inkassopart, skal betalingsinformasjonen i fakturaen frå inkassoselskapet nyttast ved betaling.

5.4.5 Idrettssenteret har rett til å endre medlemsavgifter, andre avgifter og vilkår. Ved endring av medlemsavgifta tek Idrettssenteret atterhald om årleg prisjustering av løpande avtalar i samsvar med konsumprisindeksen utan føregåande varsling. Ved andre prisjusteringar skal Idrettssenteret varsle medlemmet minst éin månad på førehand via e-post, SMS, Spenst Norge-appen eller «Mi side». Prisendringa trer i kraft éin månad etter at varsel er sendt, rekna frå fyrste månadsskifte.

6. BEDRIFT, FOREINING OG LAG

6.1 Medlemskapet følgjer medlemmet personleg.Dersom medlemmet har medlemskap gjennom ei bedriftsavtale og arbeidsforholdet opphøyrer, blir medlemskapet automatisk overført til ordinær medlemspris dersom ikkje anna er avtalt.

7. PRISENDRING OG PRISJUSTERING

7.1 Idrettssenteret tek atterhald om årleg prisjustering av løpande medlemsavtalar i samsvar med konsumprisindeksen utan føregåande varsling. Andre prisendringar kan gjennomførast når saklege forhold tilseier det. Medlemmet skal då varslast i samsvar med punkt 5.4.5.
 

8. UTESTENGING

8.1 Brot på medlemsavtalen og/eller vesentleg mishald av Idrettssenteret sine interne reglar og retningslinjer kan føre til utestenging, sperring eller oppseiing av medlemskapet med umiddelbar verknad. Som vesentleg mishald blir mellom anna rekna manglande betaling av medlemsavgift eller andre avgifter trass i inkassovarsel eller annan betalingspåminning.

8.2 Følgjande forhold kan mellom anna bli rekna som brot på medlemsavtalen:

•  tjuveri frå senteret eller andre medlemer 

• helsemessige forhold som medfører fare for skade i samband med bruk av tilbodet 

• åtferd som strir mot Idrettssenteret sitt føremål, verdiar eller interesser 

• trugande eller krenkjande åtferd overfor medlemer eller tilsette 

• hærverk på lokale, utstyr eller eigedelar som tilhøyrer Idrettssenteret 

• å sleppe inn personar som ikkje har gyldig medlemskap eller tilgang 

• manglande etterleving av trivselsreglar etter pålegg frå tilsette 

• manglande etterleving av skriftlege eller munnlege åtvaringar frå Idrettssenteret 

• brot på dopingføresegnene, inkludert unnlatelse av å avgi dopingprøve etter førespurnad i samsvar med gjeldande reglar 

8.3 Før vedtak om utestenging blir gjort, kan Idrettssenteret vurdere om medlemmet skal få høve til å uttale seg, med mindre forholdet er så alvorleg at umiddelbar reaksjon er nødvendig.

8.4 Vedtak om utestenging kan omfatte eitt eller fleire senter som er eigde eller drivne av Idrettssenteret.
 

9. KJØP AV MEDLEMSKAP UTANFOR VANLEG SALSSTAD

9.1 Etter angrerettlova § 20 har medlemmet rett til å gå frå medlemsavtalen ved å kontakte Idrettssenteret innan 14 dagar etter at medlemsavtalen vart inngått.

9.2 Medlemmet kan nytte angrerettskjema dersom det er ønskjeleg.

9.3 Angreretten gjeld berre dersom medlemskapet er inngått utanfor Idrettssenteret sin ordinære salsstad.

9.4 Ved bruk av angreretten skal eventuelle forskotsbetalte avgifter betalast tilbake i samsvar med gjeldande lovverk.

9.5 Medlemmet må sjølv kunne dokumentere at angreretten er nytta innan gjeldande fristar.

10. OPPHØYR AV MEDLEMSKAP

10.1 Det lokale senteret er ansvarleg for refusjon av forskotsbetalte medlemskap dersom lisensforholdet mellom kjedeeigar og kjededrivar opphøyrer medan medlemsavtalen framleis gjeld.

10.2 Refusjon skal avgrensast til den delen av medlemskapet som ikkje er nytta på tidspunktet for opphøyr.

11. ANSVARSAVGRENSING, TVIST OG VERNETING

11.1 Idrettssenteret er ikkje ansvarleg for hindringar eller avgrensingar som fører til redusert treningstilbod for medlemmet når forholdet ligg utanfor Idrettssenteret sin kontroll, og konsekvensane ikkje med rimelegheit kunne vore føresette eller unngåtte. Dette gjeld mellom anna forhold som er omfatta av punkt 3 om force majeure.

11.2 Medlemsavtalen er underlagd norsk rett.

11.3 Tvistar mellom medlemmet og Idrettssenteret skal søkjast løyste gjennom dialog og minneleg semje.

11.4 Dersom partane ikkje kjem fram til ei løysing, kan kvar av partane bringe saka inn for ordinære domstolar med verneting etter gjeldande prosessreglar.

11.5 Dersom det oppstår motstrid mellom norsk og engelsk versjon av medlemsavtalen, skal den norske versjonen gå føre.

SÆRSKILDE LOKALE VILKÅR

12. OPPSEIING

12.1 Medlemskapet kan seiast opp når medlemmet ønskjer det, men vil som minimum løpe ut den bindingstida som gjeld for det aktuelle medlemskapet.Når bindingstida er utløpt, går medlemskapet over til eit løpande avtaleforhold.

12.2 Oppseiing skal sendast til medlemsservice.sogndal@spenst.no. Medlemmet må sjølv kunne dokumentere at oppseiinga er sendt. Medlemsservice skal innan sju verkedagar etter motteken oppseiing sende skriftleg stadfesting per e-post.

12.3 Oppseiingstida er éin månad rekna frå første månadsskifte etter at oppseiinga er motteken ved senteret eller postlagd.

Oppseiing bør skje skriftleg via e-post, brev eller personleg oppmøte ved det lokale senteret der medlemmet er registrert, slik at oppseiinga kan dokumenterast av begge partar.

12.4 Dersom medlemmet seier opp medlemskapet medan det er i ein godkjend fryseperiode, gjeld éin månad oppseiingstid etter at fryseperioden er avslutta. Oppseiinga får verknad ved utløpet av den påfølgjande månaden.

13. FRYSING AV MEDLEMSKAP

13.1Medlemmet kan søkje om å fryse medlemskapet sitt i Idrettssenteret. Med frysing meiner ein mellombels stans av medlemskapet for ein avgrensa periode. Medlemskap med bindingstid kan frysast dersom vilkåra for dette er oppfylte.

13.2 Vanlege grunnar for frysing er:

•  sjukdom 

• svangerskap 

• militærteneste 

• andre særlege forhold som hindrar trening ved Idrettssenteret 

Det blir ikkje innvilga frysing eller betalingsfritak ved ferieavvikling.

13.3 Særskilde lokale vilkår gjeld for fryse- eller pausegebyr. Oppdaterte satsar skal til kvar tid vere tilgjengelege på nettsidene til det lokale senteret.

13.4 Dersom medlemmet er bunden av bindingstid, blir bindingstida forlenga tilsvarande den perioden medlemskapet er frose.

13.5 Søknad om frysing skal sendast til medlemsservice.sogndal@spenst.no.Medlemmet må sjølv kunne dokumentere at søknaden er sendt. Medlemsservice skal innan sju verkedagar etter motteken søknad gi skriftleg tilbakemelding per e-post.

13.6 Ved behov for vidare frysing må medlemmet sende inn ny søknad for den ønskte perioden. Søknad om forlenging må vere motteken før gjeldande fryseperiode går ut.

13.7 Ved innvilga frysing kan Idrettssenteret krevje eit rimeleg administrasjons- eller frysegebyr i samsvar med gjeldande prisar.

14. TILGANG OG OVERVAKING

14.1Idrettssenteret har installert tilgangskontroll- og overvakingssystem.

Ved inngåing av medlemskap samtykkjer medlemmet til at desse systema blir nytta for å førebyggje uønskte hendingar, oppretthalde nødvendig kontroll og bidra til eit trygt og sikkert miljø for alle medlemer og tilsette.

14.2 Ved naudssituasjonar utanom betent opningstid skal medlemmet kontakte vakttelefon. Telefonnummer til vakttelefon er oppgjeve ved utgangen frå senteret.

Gjeldande branninstruksar er tilgjengelege i lokala og skal følgjast ved behov.

14.3 Tilgangen til senteret er strengt personleg.

Dersom eit medlem slepper inn personar som ikkje har gyldig medlemskap eller annan godkjend tilgang, kan medlemskapet avsluttast med umiddelbar verknad. I tillegg kan det krevjast eit kontroll- eller misleghaldsgebyr på kr 3 000.

14.4 Idrettssenteret har rett til å gjennomføre kontroll av personar som oppheld seg i lokala for å sikre at medlemsvilkåra blir etterlevde.

14.5 Alarmanlegget blir aktivert ved midnatt. Alle medlemer skal då ha forlate bygget. I enkelte tilfelle kan lys og andre tekniske installasjonar bli automatisk slått av.

14.6 Kameraovervaking og behandling av innhenta opplysningar skjer i samsvar med gjeldande personvernregelverk og anna relevant lovgiving.

15. OPPBEVARING OG ANSVAR VED TJUVERI

15.1 Ved oppbevaring av personlege eigedelar i skap på senteret er medlemmet sjølv ansvarleg for å sikre at skapet er forsvarleg låst.

15.2 Dersom eigedelar blir etterlatne i skap etter ordinær stengetid, har Idrettssenteret rett til å opne skapet og oppbevare eigedelane på ein forsvarleg måte.

15.3 Medlemmet pliktar å hente attgløymde eigedelar innan to veker etter at dei er tekne vare på av Idrettssenteret.

15.4 Idrettssenteret kan ikkje haldast ansvarleg for tap, skade eller tjuveri av personlege eigedelar, heller ikkje i perioden der slike eigedelar blir oppbevarte av senteret.

16. RABATTORDNINGAR

16.1 Studentrabatt 

Studentar får den til kvar tid gjeldande rabattsatsen ved teikning av medlemskap.For å ha rett til studentrabatt må medlemmet leggje fram gyldig dokumentasjon ved innmelding og deretter årleg så lenge rabatten blir nytta. Retten til studentrabatt fell bort frå fylte 30 år, uavhengig av om medlemmet framleis kan dokumentere studentstatus. NB! Dette gjeld ikkje HVL studentar som sponsast av Saman.Når vilkåra for studentrabatt ikkje lenger er oppfylte, blir medlemsavgifta justert til ordinær gjeldande pris.

16.2 Bedriftsrabatt

Bedriftsrabatt kan givast gjennom særskilde avtalar mellom Idrettssenteret og den aktuelle verksemda. Medlemmet må kunne dokumentere at vedkomande er omfatta av bedriftsavtalen. Medlemmet pliktar å varsle Idrettssenteret dersom arbeidsforholdet opphøyrer. Når vilkåra for bedriftsrabatt ikkje lenger er oppfylte, blir medlemsavgifta justert til ordinær pris. Medlemskapet held deretter fram som eit ordinært medlemskap til det eventuelt blir sagt opp.

16.3 Subsidierte bedriftsavtalar

Ved subsidierte bedriftsavtalar pliktar arbeidsgivaren å varsle Idrettssenteret dersom medlemmet sluttar i verksemda. Etter motteke varsel skal Idrettssenteret innan éin månad informere medlemmet skriftleg om at vilkåra for subsidiert medlemskap ikkje lenger er oppfylte. Frå dette tidspunktet blir medlemmet sjølv ansvarleg for betaling av medlemsavgifta, som blir justert til ordinær pris. Medlemskapet held fram til medlemmet eventuelt nyttar oppseiingsretten sin.

16.4 Pensjonistrabatt

Personar frå fylte 67 år får den til kvar tid gjeldande pensjonistrabatt ved teikning av medlemskap. Pensjonistrabatt blir også gitt til personar som kan dokumentere uføretrygd.

16.5 Medlemskap for personar under 18 år

Personar under 18 år får tilbod om eigne medlemskap tilpassa aldersgruppa. Vilkåra for slike medlemskap følgjer dei medlemskapstypane som til kvar tid blir tilbydde av Idrettssenteret.

17. PRISGARANTI

17.1 Medlemer som har medlemskap med bindingstid, har prisgaranti på den avtalte medlemsavgifta gjennom heile bindingsperioden.

17.2 Eventuelle prisendringar kan først gjerast gjeldande etter at bindingstida er utløpt, med mindre medlemmet sjølv vel å endre medlemskapstype eller avtalevilkår.

17.3 Dersom medlemmet nyttar ei rabattordning som fell bort i løpet av bindingstida, har Idrettssenteret rett til å justere medlemsavgifta til ordinær gjeldande pris.

18. SAMTYKKE

18.1Ved inngåing av medlemsavtalen samtykkjer medlemmet til at Idrettssenteret kan registrere medlemmet i fordelsklubben og nytte elektronisk kommunikasjon for å informere om og marknadsføre tenester og tilbod i samsvar med marknadsføringslova § 15.Dette omfattar mellom anna e-post, SMS, MMS, pushvarsel og tilsvarande kommunikasjonskanalar.

18.2 Medlemmet kan når som helst trekkje tilbake samtykke til marknadsføring i samsvar med punkt 2 om Spenst Fordelsklubb.

18.3Medlemmet kan ikkje reservere seg mot meldingar som gjeld:

•  endringar i medlemsavtalen 

• viktig informasjon om medlemskapet 

• informasjon om tryggleik og bruk av senteret 

• førstegangskontakt knytt til trening og oppfølging (PT Start eller tilsvarande) 

18.4Samtykke knytt til medlemskapet gjeld så lenge medlemsavtalen varer og i seks månader etter at medlemskapet er avslutta.

18.5 Registrering i Spenst Fordelsklubb held fram sjølv om medlemsavtalen blir avslutta. Dersom medlemmet ikkje lenger ønskjer å vere registrert i Fordelsklubben, må vedkomande melde seg ut særskilt.

19. ADMINISTRASJONSGEBYR

19.1Ved oppretting av medlemskap blir det kravd inn eit administrasjonsgebyr på kr 249,-.

19.2 Administrasjonsgebyret blir fakturert éin gong per medlemskapsperiode.

19.3 Ved nyteikning av medlemskap etter eit opphald på meir enn éin månad blir administrasjonsgebyret kravd inn på nytt.
 

20. ANSVARSERKLRÆING KLATRING

20.1 Eg er innforstått med at klatring og aktivitet på Sogndal Klatresenter inneber risiko, og at all aktivitet og opphald på senteret skjer på eige ansvar.

20.2 Eg stadfestar ved signering at eg har lese, forstått og vil følgje gjeldande sikkerheitsreglar og instruksar frå Sogndal Klatresenter. Sikkerheitsinformasjonen blir revidert jamleg, og det er mitt ansvar å halde meg oppdatert på gjeldande reglar. Ved brot på sikkerheitsreglane eller instruksar frå personalet har Sogndal Klatresenter rett til å fråta sikringskort eller bortvise personar etter eige skjønn.

20.3 For personar i aldersgruppa 13–17 år må føresett signere ansvarserklæringa. Born under 13 år skal vere i følgje med ein ansvarleg vaksen. Den vaksne har ansvar for at barnet forstår og følgjer sikkerheitsreglane, inkludert kameratsjekk ved bruk av autobelay.

20.4 Ved opphald på Sogndal Klatresenter pliktar eg å:

•  ikkje springe i anlegget

• bruke innestemme

• ikkje ta med potensielt lause gjenstandar opp i klatreveggen

• unngå å stikke fingrar i bolthengarar, karabinarar eller anna metall

• berre nytte klatreutstyr som er godkjent av UIAA (CE-godkjenning). 

20.5 Autobelay (automatiske sikringsmaskiner)

For å klatre på autobelay må eg ha Brattkort, Topptaukort eller Autobelaykort frå Noregs Klatreforbund. Eg er ansvarleg for at kameratsjekk blir utført før eg forlèt bakken. For born under 13 år er den ansvarlege vaksne ansvarleg for kameratsjekken. Autobelay kan berre nyttast av personar med kroppsvekt mellom 10 og 135 kg.

20.6 Buldring

Ved buldring er eg sjølv ansvarleg for å vere merksam på andre buldrarar og halde trygg avstand. Madrassene er til tryggleik for dei som buldrar. Leik og annan aktivitet på madrassene er ikkje tillaten. Eg skal gjere meg kjend med god fallteknikk før eg klatrar til toppen av veggen, og unngå ukontrollerte rørsler, særleg når eg er høgt oppe i veggen.

20.7 Tauklatring

Eg er ansvarleg for å kjenne til og følgje Klatrevettplakaten. Dei som er på bakken har vikeplikt for dei som først var oppe i klatreveggen. Sogndal Klatresenter tilrår bruk av assisterande taubrems, og frå 01.01.2025 er det påbod om bruk av assisterande taubrems i klatreanlegget. Veggar med autobelay skal ikkje nyttast til led- eller topptauklatring utan avtale med Sogndal Klatresenter. For å sikre på topptau krevst gyldig Topptaukort. For å sikre ved ledklatring krevst gyldig Brattkort.

20.8 Ledklatring

Ved ledklatring skal alle mellomforankringar frå og med den andre kortslynga og opp til toppankeret nyttast. Det skal aldri vere meir enn eitt tau i toppankeret.

20.9 Varslingsplikt

Eg pliktar å varsle personalet dersom eg oppdagar feil eller manglar ved anlegget, eller dersom eg ser åtferd som kan føre til fare eller risiko for andre.

20.10 Ansvarsavgrensing

Sogndal Klatresenter fråseier seg erstatningsansvar for skadar som måtte oppstå under klatring eller annan aktivitet på senteret, så langt dette er tillate etter gjeldande lovverk.

20.11 All lønna instruksjon og instruksjon for grupper skal avtalast med Sogndal Klatresenter på førehand.